40 نصيحة للمهندس

1. الوضع حالياً سواء في مصر أو دول الخليج مش في أفضل حالاته طبعاً و الرواتب مش متناسبه مع الأسعار و مش بسهوله هتلاقي شغل بعد التخرج.. و لكن مع كل ده في ناس بتنجح و بوصل لأهدافها و لازم يكون عندك أمل و ماتيأسش و ماتستلمش لكلام الأشخاص المحبطين اللي هتسمعه كتير الفترة الجاية.

2. بالنسبة للـ CV لازم تكتبها بشكل إحترافي و لو عملت Search هتلاقي مواقع كتير عليها نماذج جاهزة للـ CV تقدر تستخدمها، و الـ CV بتاعتك لازم تكون English و يكون الـFont المستخدم Formal ، و ماتعملش Frame للـ CV و ماتستخدمش ألوان كتير ولا أكتر من Font، في بداية الـ CV بتكتب اسمك و رقم موبايلك و الـ e-mail بتاعك و بعدين الـ Career Objective و الـ Education و بعدها لو في أي خبرات سابقة ليك هتكتبها.. لو مافيش هتكتب الـ Skills بتاعتك و كل البرامج اللي بتشتغلها و الكورسات اللي أخدتها، و آخر حاجة في الـ CV هي بياناتك الشخصية كاملة زي موقفك من التجنيد و الحالة الإجتماعية و محل اللإقامة.. إلخ.

3. خلي بالك إن الـ CV ليها دور كبير جداً لأنها بتدي إنطباع مبدئي عنك، و لو الـ CV بتاعتك مش معموله بشكل إحترافي فرصتك في إنك تلاقي شغل هتكون ضعيفة فعلاً.

4. الـ CV للمهندس حديث التخرج ماينفعش بأي حال من الأحوال تزيد عن صفحتين.. و ممكن تكون صفحة واحدة.

5. الـ Smart CV مش دايماً بتكون أفضل حاجة بالنسبة لمهندسين مدني.. الـ CV التقليديه بتدي إنطباع أفضل عنك و بتكون أوضح في الطباعة.

6. الـ CV ماينفعش يكون فيها أي بهرجة.. كل ماتكون Simple كل ماتكون أفضل و أنسب.

7. لما تبعت الـ CV بتاعتك لأي شركة لازم تبعتها من الإيميل الخاص بيك ولازم يكون اسم الإيميل Formal و مهم جداً إنك تكتب في خانة الـ Subject كود الوظيفة أو مسمى الوظيفة اللي انت متقدم لها.

8. ماتبعتش الـ CV لنفس الشركة أكتر من مرة.

9. ماتبعتش الـ CV لأكتر من شركة في نفس الإيميل و غلط تحط إيميلات الشركات على الـ CC ، و لكن ممكن تستخدم خانة الـ BCC بحيث مايظهرش للشركات اللي انت بتبعتلها إنك باعت لأكتر من شركة.

10. من أهم الخطوات اللي هتساعدك في رحلة البحث عن عمل هي إنك تعمل أكاونت على LinkedIn و تتابع فيه الشركات.

11. لازم تكون محدد هدفك و انت بتدور على شغل.. ولازم الـCV بتاعتك تعبر بوضوح عن الهدف ده، بمعنى إن ماينفعش تبقى انت بتقدم على شغل مهندس موقع و انت في الـ CV مركز على برامج التصميم و مش جايب سيرة أي دورات أو مهارات اكتسبتها ليها علاقة بالموقع، و ماينفعش تكون بتقدم على شغل مكتب فني و إنت ماتعرفش أي برامج ليها علاقة بالمكتب الفني، هكذا بالنسبة للتصميم و إدارة المشروعات، يفضل الـ CV بتاعتك اللي يشوفها يفهم منها إنت حابب تشتغل في إيه.

12. اختيارك للمجال و التخصص اللي حابب تشتغل فيه من أكتر الخطوات اللي هتساعدك سواء و انت بتطور نفسك أو و انت بتدور على شغل.

13. تحاول تركز على تخصص معين أو تخصصين و تطور نفسك فيهم قدر استطاعتك و تقدم في الشركات على الوظايف دي فقط عشان ماتشتتش نفسك.

14. طبيعي إنك تبقى تايه و مش عارف أصلاً سوق العمل شكله عامل إزاي و إيه التخصصات اللي فيه و متطلباتها “هنكتب بوست تفصيلي عن سوق العمل لأن الموضوع يطول شرحه”

15. لما تروح نقابة المهندسين عشان تطلع كارنية النقابة.. هتلاقي كارنية اسمه “اتحاد المهندسين العرب” ده كارنية إختياري.. ماتطلعوش عشان غالباً مش هتستفيد منه في حاجه.

16. البطاقة العلاجية الخاصة بنقابة المهندسين مفيده و هتوفرلك كتير لو بتتردد كتير على أطباء أو بتحتاج تعمل تحاليل و آشعات أنت أو حد من أهلك.

17. في رحلة البحث عن العمل لازم تشتغل على 5 محاور أساسية: 1- متابعه إعلانات التوظيف على مواقع السوشيال ميديا و على جروبات التوظيف و على المواقع الخاصة بالتوظيف و من خلالها تبعت الـ CV بتاعتك للشركات اللي طالبه مهندسين. 2- تطبع الـCV و تنزل بنفسك لمقرات الشركات و تقدم الـCV. 3- متابعة إعلانات الجرائد زي الوسيط و الأهرام لأن في شركات مابتنزلش إعلانات على النت. 4- الأكاونت الخاص بيك على لينكد إن. 5- المعارف و العلاقات و الأصحاب اللي ممكن من خلالهم تعرف إن في شركات معينة طالبه مهندسين فتقدر تقدم فيها.

18. لازم تكون متوقع و مهيأ نفسك لإن مش بسهولة و بسرعة هتلاقي وظيفة مناسبة.. فلازم يكون عندك شويه صبر و إصرار و ماتيأسش.

19. لو إنت مابتعرفش تشتغل على برامج هندسية و مش واخد أي كورسات لازم تكون عارف إن فرصتك في إنك تلاقي شغل هتكون ضعيفة.. عشان كدة لازم تشتغل على نفسك كويس و تطور مهاراتك قبل ماتقدم على شغل.

20. لازم تسأل نفسك سؤال مهم قبل ماتبعت الـCV بتاعتك.. ليه صاحب الشركة هيشغلك؟ لازم تكون متميز في حاجة معينة عن غيرك عشان تكون فرصتك أكبر من باقي اللي هيقدموا.

21. في الإنترفيو.. أهم حاجة ثقتك بنفسك و إنك ماتبالغش في تقديرك لذاتك و تكون لبق و مظهرك كويس و تبين لصاحب الشغل إنك عندك المقدره على التعلم بسرعة.

22. مافيش حاجة اسمها أسئلة الإنترفيو لازم تذاكرها قبل ماتروح.

23. مهم إنك تعرف معلومات عن الشركة اللي مقدم فيها قبل الإنترفيو.

24. في الإتفاق على الراتب لازم تكون عارف متوسط راتب دفعتك في حدود كام، ولازم تتفق على كل التفاصيل و البدلات الخاصة بالشغل.

25. لازم يكون عمد فكرة كافية عن مسوغات التعيين و التأمينات و عقد العمل و قانون العمل و حقوقك في الشركة قبل ماتشتغل.

26. لو مقاول طلب منك إنه يأمن عليك عشان يقدر يشيل شغل (بدون ماتكون شغال معاه فعلياً) ماتوافقش تحت أي ظرف حتى لو هيدفعلك مبلغ كبير.

27. إياك و مكاتب التوظيف لأن أغلبهم نصابين و بيستغلوا حاجة حديثي التخرج.

28. إوعى تحت أي ظرف تملى أبليكيشن للشغل بفلوس.

29. ماتدفعش لحد فلوس عشان يسفرك بره.

30. ماتسافرش على فيزا بوظيفة تانية غير مهندس.

31. فكرة إنك تسافر بلد بره مصر تدور على شغل هناك و انت مالكش فيها معارف دي مش أفضل فكرة في الدنيا.

32. يفضل تشتغل في بلدك الأول على الأقل سنة تكتسب فيها خبرة و بعدين تسافر على فرصة أفضل عشان ماتتعبش.

33. فترة ماقبل الجيش فترة مدمرة للأعصاب لأنك بتكون مش عارف تقدم على شغل ولا عارف تسافر.. عشان كدة لازم تحاول تستغل الفترة دي في حاجة مفيدة زي إنك تطور نفسك.. تتعلم برامج.. تاخد كورسات.. تنزل تدريب.. تشتغل أي شغل حتى لو مش في مجالك بس تكتسب منه خبرات و تكسب فلوس تساعدك في التطوير.

34. لو بتفكر تحضر ماجيستير لازم تسأل نفسك سؤال مهم.. إنت عاوز تحضر ماجيستير ليه. هل هو بالنسبالك غايه ولا وسيلة! لو إجابتك إنه غايه يبقى بلاش تحضر ماجيستير.. إنما لو وسيلة لهدف محدد في دماغك يبقى توكل على الله بس إختار كويس إنت هتحضر في أي مجال و تخصص و في أي جامعة.

35. سوق العمل مابيعترفش بالشهادات و التقديرات و الدرجات العلمية بقدر مابيعترف بالمهارات و الخبرات.

36. لازم تكون عارف و متأكد إنك مهما أخدت راتب كبير.. مستحيل تقدر تحوش منه و تبني مستقبلك.. الفلوس بتيجي من الشغل الخاص.

37. مش عيب إنك عشان تزود دخلك تشتغل شغلانه إضافيه بعيده عن مجالك.. العيب هو إنك تبقى نضغوط مادياً و مكسوف تشتغل.

38. لو شاطر في حاجة زي الـGraphic Design أو التصوير أو الكتابة أو البرمجة… إلخ، أو أي مجال ممكن تكسب منه فلوس.. حاول قدر إستطاعتك تستغل ده في شغل جانبي حتى لو Freelancer ، لأن الزمن اللي إحنا بنمر بيه حالياً مش زمن الوظيفة الواحدة.

39. اقطع علاقتك فوراً بكل الأشخاص المٌحبِطين و المُحبَطين و الكثيري الشكوى و التذمر و اللي بيتكلموا في المشاكل مش في الحلول و اللي طول الوقت مش راضيين عن أي وضع.. لأن وجودك جنب الناس دي هينقلك طاقة سلبية كافية جداً إنها تدمرلك مستقبلك.

40. لازم يكون عندك قناعة و يقين إن ربنا مش هيضيع تعبك و إن رزقك مكتوبلك و ماحدش هياخده غيرك إنت فقط المطلوب منك تسعى و تعمل اللي عليك وتأخذ بكل الأسباب الممكنه و تنتظر وعد ربنا بإنه مش هيضيعك.